అల్వాల్‌లో ‘మీ సురక్ష సహచరి" అవగాహన కార్యక్రమం, మాదకద్రవ్యాలు, సైబర్ నేరాలు, మహిళల భద్రతపై ప్రజలకు అవగాహన, డ్రగ్స్ వినియోగం, విక్రయాల సమాచారం 1908కు ఇవ్వాలి: పోలీసుల పిలుపు..

అల్వాల్‌లో ‘మీ సురక్ష సహచరి" అవగాహన కార్యక్రమం,

మాదకద్రవ్యాలు, సైబర్ నేరాలు, మహిళల భద్రతపై ప్రజలకు అవగాహన,

డ్రగ్స్ వినియోగం, విక్రయాల సమాచారం 1908కు ఇవ్వాలి: పోలీసుల పిలుపు..

మేడ్చల్ మల్కాజ్గిరి జిల్లా సెప్టెంబర్ 16, మన వార్త: మాదకద్రవ్యాలకు యువత దూరంగా ఉండాలని, సైబర్ నేరాల పట్ల అప్రమత్తంగా వ్యవహరించాలని మల్కాజ్‌గిరి పోలీస్ కమిషనరేట్ అధికారులు పిలుపునిచ్చారు. మహిళల భద్రత, ట్రాఫిక్ నిబంధనలు, ఆహార భద్రత తదితర అంశాలపై ప్రజలకు అవగాహన కల్పించేందుకు అల్వాల్‌లో ‘మీ సురక్ష సహచరి’ కార్యక్రమంలో భాగంగా అవగాహన కార్యక్రమాన్ని నిర్వహించారు.

మంగళవారం సాయంత్రం అల్వాల్ పోలీస్ స్టేషన్ సమీపంలోని గణేష్ మండపం వద్ద ఏహెచ్‌ఏ ప్రశాంత్ ఆధ్వర్యంలో ‘సే నో టు డ్రగ్స్’ కార్యక్రమం నిర్వహించారు. ఈ కార్యక్రమానికి బేగంపేట డివిజన్ ఏసీపీ పి.గోపాలకృష్ణమూర్తి, నార్కోటిక్ బ్యూరో ఏసీపీ హరీష్ చంద్రారెడ్డి ముఖ్య అతిథులుగా హాజరయ్యారు.

ఈ సందర్భంగా ఏసీపీలు మాట్లాడుతూ మాదకద్రవ్యాల వినియోగం వల్ల కలిగే అనర్థాలను, ముఖ్యంగా యువతపై పడే ప్రతికూల ప్రభావాలను వివరించారు. డ్రగ్స్‌కు అలవాటు పడటం వల్ల వ్యక్తిగత ఆరోగ్యంతో పాటు కుటుంబ, సామాజిక జీవితంపై కూడా తీవ్ర ప్రభావం పడే అవకాశం ఉందని తెలిపారు. మాదకద్రవ్యాల నిర్మూలనలో పోలీసులు మాత్రమే కాకుండా తల్లిదండ్రులు, విద్యార్థులు,యువత, స్థానిక ప్రజలు కూడా తమ వంతు బాధ్యతగా భాగస్వాములు కావాలని సూచించారు.

అలాగే సైబర్ నేరాల విషయంలో అప్రమత్తంగా ఉండాలని, మహిళల భద్రతకు సంబంధించిన అంశాల్లో వెంటనే పోలీసులను సంప్రదించాలని సూచించారు. ట్రాఫిక్ నిబంధనలు పాటించడం ద్వారా ప్రమాదాలను నివారించవచ్చని, ప్రజలు రోడ్డు భద్రతపై బాధ్యతాయుతంగా వ్యవహరించాలని కోరారు. ఆహార భద్రత విషయంలోనూ ప్రజలు జాగ్రత్తలు తీసుకోవాలని అవగాహన కల్పించారు.

కమ్యూనిటీ పరిధిలో ఎవరైనా మాదకద్రవ్యాలను వినియోగిస్తున్నా, విక్రయిస్తున్నా లేదా వాటి అక్రమ కార్యకలాపాలకు పాల్పడుతున్నట్లు సమాచారం ఉంటే 1908 టోల్‌ ఫ్రీ నంబర్‌కు తెలియజేయాలని అధికారులు కోరారు. సమాచారం అందించే వారి వివరాలను గోప్యంగా ఉంచుతామని తెలిపారు.

కార్యక్రమంలో డీఐ ప్రవీణ్ కుమార్, ఎస్ఐలు, పోలీసు సిబ్బంది, స్థానిక ప్రజలు పాల్గొన్నారు. యువతను మాదకద్రవ్యాల బారిన పడకుండా కాపాడేందుకు ఇలాంటి అవగాహన కార్యక్రమాలను మరింత విస్తృతంగా నిర్వహించాల్సిన అవసరం ఉందని అధికారులు పేర్కొన్నారు.